Balita

Mula sa pagiging broadcaster bago maging propesyonal, inilahad ni Fire Inspector Julienne Sheen C. Fresnova na ang karanasan niya sa broadcasting ang humubog sa kaniyang kumpiyansa, disiplina, at kakayahang magsalita sa harap ng publiko sa isinagawang mini press conference sa Dilangalen National High School (DNHS) nitong Hulyo 26, 2026.

Ayon kay Fresnova, ang disiplina at kasanayang nahubog sa journalism ay naging mahalagang salik sa kanyang pagtatapos bilang Top 6 sa Final Order of Merit at Top 4 sa BSFPA Academic Standing ng Philippine Public Safety Academy (PPSA).

“Journalism prepared me because journalism taught me to think before speaking, to verify before believing, and to remain calm under pressure,” ani Fresnova. Sinabi rin niya na ang mga natutunan niya sa journalism ay nagamit niya sa iba’t ibang gawain bilang cadet at hanggang sa kasalukuyan niyang trabaho bilang Fire Inspector sa Bureau of Fire Protection (BFP).

Iniwan ni Fresnova ang mensaheng, “Excellence beyond everything.” Iginiit niyang ang pagbibigay ng pinakamahusay sa bawat gawain ay mas mahalaga kaysa sa paghahangad lamang ng pagkilala.

Hinikayat din niya ang mga mag-aaral na pahalagahan ang kanilang karanasan sa journalism dahil maaari itong magsilbing pundasyon sa anumang propesyon na kanilang tatahakin sa hinaharap.

Sa pamamagitan ng kaniyang kuwento, ipinakita ni Fresnova na ang journalism ay hindi lamang paghahanda para sa larangan ng media, kundi isang kasanayang maaaring maging sandigan.

“Hindi tayo babae lang. Babae tayo”

Ibinahagi ni Fire Inspector Julienne Sheen C. Fresnova ang kanyang adbokasiya sa women empowerment at ang kahalagahan ng pantay na oportunidad para sa kababaihan sa isang mini press conference na ginanap sa Dilangalen National High School (DNHS) nitong Hulyo 26, 2026.

Ipinaliwanag ni Fresnova na ang paksang ito ay hindi lamang tungkol sa pagkakaroon ng pantay na oportunidad, kundi sa pagpapatunay na kayang makipagsabayan ng kababaihan sa mga larangang matagal nang kinikilalang dominado ng kalalakihan.

Aniya, hinarap niya ang mga pagdududa sa kanyang kakayahan nang pumasok siya sa Philippine Public Safety Academy (PPSA), ngunit pinatunayan niya na kaya niyang makipagsabayan sa mahihirap na pagsasanay sa pamamagitan ng determinasyon at kahusayan.

“Sabayan natin kung anong kaya ng mga lalaki. Hindi tayo babae lang. Babae tayo,” ani Fresnova bilang panawagan sa mga kababaihang huwag hayaang maging hadlang ang kasarian sa pag-abot ng kanilang mga pangarap.

Sinagot din ni Fresnova ang mga katanungan tungkol sa kanyang naging karanasan bilang babaeng opisyal ng Bureau of Fire Protection at ang mga hamong kanyang nalampasan sa pagbuo ng kanyang karera.

Idinagdag pa niya na ang tunay na sukatan ng kakayahan ay hindi kasarian kundi ang dedikasyon, sipag, at kahandaang patunayan ang sariling kakayahan sa anumang propesyon.

Isinagawa ang mini press conference bilang bahagi ng pagsasanay ng mga mag-aaral sa wastong pagtatanong at pakikipanayam habang natututo mula sa mga karanasan at adbokasiya ng mga propesyonal sa iba’t ibang larangan.

Fire inspector nagbahagi ng inspirasyon sa DNHS campus journalists.

Naging panauhing tagapagsalita si Fire Inspector Julienne Sheen C. Fresnova sa Dilangalen National High School (DNHS) nitong Hulyo 26, 2026, upang magbahagi ng mensaheng naglalayong magbigay-inspirasyon sa mga mamahayag at manunulat.

Idinaos ang programa sa loob ng paaralan bilang bahagi ng dalawang araw na in-house training ng campus journalists, kung saan tinalakay ni Fresnova ang kahalagahan ng disiplina, oras, at patuloy na pagsisikap sa pag-abot ng mga mithiin.

“Hindi po hadlang ang kahirapan sa ating mga pangarap,”ani Fresnova.

Binigyang-diin niya ang kahalagahan ng pagkakaroon ng inspirasyon at dedikasyon sa bawat gawain bilang mga hakbang sa pag-abot ng kaniyang mga mithiin.

“The key to balance everything is compartmentalization. You discipline yourself to do things on their own time tables” dagdag ni Fresnova.

Aniya, ang bawat hamon ang humubog sa kanya upang huwag sumuko at patuloy na mangarap.

Ang programa ay dinaluhan ng mga campus journalist, guro, at tagapayo sa pamamahayag bilang bahagi ng paghahanda ng paaralan para sa mga nalalapit na kompetisyon sa dyurnalismo.

Nagtapos ang programa sa pagbibigay ng sertipiko ng pagkilala at pasasalamat kay Fresnova, bago ipinagpatuloy ang iba pang sesyon ng in-house training.