Guhit ng Kapalaran

May mga taong pumapasok sa isang paaralan na tila bagong pahina sa isang aklat, ngunit may dalang kuwento na matagal nang naisulat.

 Isa si Albert Ryan Eliseo sa mga bagong mukha sa Dilangalen National High School, tatlong buwan pa lamang naninirahan sa mundong ito ng mga silid-aralan, ngunit bitbit na ang mga aral na hinubog ng mahabang paglalakbay.

Mula elementarya hanggang high school, hindi na banyaga sa kaniya ang mundo ng sining. Bilang isang cartoonist noong elementarya, ang lapis ang naging unang wikang kaniyang natutuhan.

 Pagsapit naman ng high school, pagsusulat ang naging kaniyang paraan upang maipahayag ang damdamin. Hindi man siya nakipagpaligsahan sa pagsusulat, ginawa niya itong salamin ng kaniyang sarili at bintana upang maunawaan ang mundong kaniyang ginagalawan.

Ngunit higit pa sa tinta at guhit ang kaniyang baon. Mula 2016 hanggang 2018, nag-aral siya sa SCC at kalaunan nagtapos siya ng Bachelor of Science Major in Biology. Sa Licensure Examination for Teachers, umabot siya sa Top 3 sa buong Pilipinas, isang tagumpay na tila bituin sa mahabang gabi ng pagsisikap. 

Sa likod ng ranggong iyon ay hindi lamang katalinuhan, kundi tiyaga at paninindigang patuloy na humahakbang kahit mahaba ang daan.

Sa Dilangalen National High School, hindi lamang kaalaman ang kaniyang nais ibahagi. Isa rin siyang tagapagtaguyod ng gender sensitivity, na naniniwalang ang pagiging isang taong may awtoridad ay hindi nasusukat sa taas ng posisyon kundi sa paraan ng paggamit nito para igalang at pakinggan ang bawat isa. 

“Kasi as a student before, I have a problem with my identity and wala akong masabihan” pahayag ni Ryan.
Kasabay nito, dala rin niya ang malasakit sa kalikasan. Sa mundong unti-unting kinakain ng kapabayaan, pinipili niyang maging isa sa mga tinig na nagpapaalala na ang kapaligiran ay hindi lamang tahanan ngayon, kundi pamana para sa bukas.

Tatlong buwan pa lamang si Tchr. Albert sa DNHS, ngunit tila marami nang bakas ang naiiwan sa kaniyang paglalakbay. 

Si Albert Ryan Eliseo ay patuloy na sumusulat ng kuwentong hindi lamang tungkol sa kaniyang sarili, kundi tungkol sa mundong nais niyang maging mas makatarungan at mas maalaga.